Page 118 - Kalendar_2020

Matilda Bölcs

Vrime nam se smije i veselo maše

Najlipše je bilo va vinogradi. Njanja su
kopali, a mi smo se med drivljem, po travi
zganjali. Va lukindrofskoj se pak lozi
sfuznuli, a konji su s koli neg letili.

Učitelji su nas naganjali na socijalizam,
farnik pričverstil va katolicizmu. Od ure
na uru prenašali smo riči njieve i postali
letieći mainstream mediji pogranične škole.
Našlo se ča toga i zuz peštanskimi vodami,
vidi slučaj kolektiv kontra J. G. Džuretin.

Nastavnik biologije bil je pravi meštar
dnevnika. Znal je školare, selske paore
postavit pred sudstvo razreda. Si su si
mogli trapit tverde glave da ne budu, kot
najveći somari, šrafi va kom-tom kotaču.

Kada je profesor Hadrović na katedri
miše til lovit, oš si ni mogal sega toga
premislit. Kako će bit selo, s koga si je
znanje djogal, za deset šilingov rasprodano.
Va županijskom listu ljudi si turobno preštu
i velu: dan za dan, krez rubriku preminulih,
starci na večni počinak idu, med njimi i
zadnji, krez 500 liet pomadjarizirani Hervati.

118 2020 HRVATSKI KALENDAR