Page 74 - Ivan_Horvat_Zidanski_dicaki
P. 74
Zidanski_dicaki.qxp 2017.10.18. 12:49 Page 72
Nač su čekali, se je dogodilo. Na Farkaši ljudi
su puni straha. Ali žitak mora pojt. Požet se mora
i ono ča je na Gornom polju. Ki se more gibat,
saki dela. Mali kozlicov je jur puno pod velikim
hrastom. Kad zavigezu žatvu, moredu meru
počinut.
Jedan dan podnoć dojde Vili doli i veli:
– Va gradi kotkad bi se spravljali na ništo, ali ni
dobro vidit. Od Sambotela se brodu po putu k
Kisegu. Ali jako polako.
– Idem gori – veli Marko. – Ću pogledat.
Dugo je zgora. Premišljava si da ča se more stat.
Ko dobro vidi, onda neg oni idu, ki su na ovu
stran grada bili. Oni moradu pervi dojt pogledat
Kiseg. Ali ča je Kisegi, ne razumi. Kad dojde doli,
veli:
– Sada vi mierkajte, ja ću se rano jutro stat i ću
pogledat ča će bit ovde. More bit i perva bitka
vani na polji.
Edan projde gori. Drugi ustanu zdola. Oganj im
meru klije. Okol njega sidu. Riči nimadu. Saki si
premišljava, da ča se more ovde stat. Ča će bit ako
Turki grad požgu, kot Sambotel. Ča će bit š
njimi. Ovde ćedu morat i krez zimu ostat? To će
bit teško.
Upametzamu da je Marko zginul.
– Kude je? – pitadu se jedan drugoga.
Ne znadu. Sidu još malo, onda veli Ive:
– Ovde sad niš ne moremo pomoć. Saki neka
ide na stelju i moramo spat. Ako se ča stane, ćemo
doznat. Vili je bil zgora. Neg najednoč dojde doli
i zbudi dičake.
72